Magpahigayon ang Gobyerno sa Lalawigan sa Sugbo og libreng pre-screening alang sa mga pasyente nga gustong makaapil sa umaabot nga medical ug surgical mission sa Bogo City. Gipatuman kini uban sa All-Terrain Medical Relief Organization, Cebu Provincial Hospital (CPH)-Bogo City, ug sa City Government of Bogo.
Kabahin kini sa selebrasyon sa anibersaryo sa pagkatukod sa Lalawigan sa Sugbo ug tumong niini nga mapadool ang dekalidad ug libreng serbisyo sa panglawas ngadto sa mga Sugbuanong nanginahanglan og operasyon. Ang mga kwalipikadong pasyente mahimong makapahimulos og libreng operasyon alang sa breast cancer, hemorrhoids, hernia, sakit sa thyroid, ug gallbladder stones.
Apil usab sa surgical mission ang gagmayng operasyon sama sa pagtangtang sa lipoma, cyst, bugon-bugon, ug uban pang dili delikadong bukol. Ang libre nga pre-screening ipahigayon sa Outpatient Department sa Cebu Provincial Hospital-Bogo City gikan alas-8:00 sa buntag hangtod alas-4:00 sa hapon sa Hulyo 29, Agosto 5, Agosto 12, ug ang katapusang pre-screening sa Agosto 13, 2026.
Giawhag sa Kapitolyo ang tanang interesadong pasyente nga moapil sa pre-screening aron mahibal-an kung kwalipikado sila ug aron masiguro nga luwas ang ilang operasyon. Ang makapasar sa medical assessment adunay higayon nga makadawat og libreng operasyon atol sa umaabot nga medical ug surgical mission.
I via Renante Socia Lada