Nagpahigayon ang Cebu City Anti-Drug Abuse Council (CADAC) sa ikatulong quarter meeting kagahapong adlawa Hulyo 23, 2026 sa Mayor’s Conference Room sa Cebu City Hall.
Gipasiugda sa maong tigom ang padayon nga paningkamot sa dakbayan aron mapanalipdan ang mga bata, pamilya, ug komunidad pinaagi sa lig-on nga kampanya batok sa ilegal nga drogas.
Gipangulohan ni Cebu City Mayor Nestor D. Archival ang miting uban sa mga miyembro sa konseho ug mga representante sa nagkadaiyang ahensya sa gobyerno. Gitambongan usab kini sa Department of the Interior and Local Government (DILG) Cebu City Field Office aron hisgutan ang mga programa ug estratehiya sa pagpugong sa paggamit sa ilegal nga drogas sa dakbayan.
Usa sa mga importanteng hisgutan mao ang plano sa paghimo og Technical Working Group (TWG) nga mangulo sa pagpatuman sa mga programa alang sa pagpanalipod sa mga kabataan, ilabina sa mga eskwelahan ug komunidad.
Gipresentar usab sa Cebu City Office of Substance Abuse Prevention (COSAP) ang 12 ka mga programa ug kalihokan nga magpasiugda sa pagpugong sa pag-abuso sa drogas.
Mitambong usab sa maong tigom ang mga representante gikan sa Cebu City Council, Cebu City Police Office (CCPO), Philippine Drug Enforcement Agency (PDEA), Department of Justice (DOJ), Department of Education (DepEd), Department of Health Office, Department of Social Welfare and Services (DSWS), Philippine National Police (PNP), ug uban pang organisasyon.
Sumala sa CADAC, ang panaghiusa sa mga ahensya ug komunidad maoy yawe aron mapanalipdan ang mga bata ug mapadayon ang luwas, himsog, ug malinawon nga Cebu City.
I via Renante Socia Lada