Gipasidunggan ni Cebu Governor Pamela Baricuatro ang mga miyembro sa Lupong Tagapamayapa atol sa 2026 Provincial Lupong Tagapamayapa Incentive Awards (LTIA) nga gipahigayon sa Department of the Interior and Local Government (DILG)-7. Matud niya, dako ang ilang papel sa pagmintinar sa kalinaw ug kahapsay sa mga barangay sa tibuok lalawigan sa Cebu.
Sa iyang mensahe, giingon ni Gov. Baricuatro nga ang tinuod ug malungtarong kalinaw magsugod sa barangay pinaagi sa panag-istoryahanay, pagpataliwala, ug pagpasinabtanay sa mga nagkalalis. Iyang gidayeg ang mga miyembro sa Lupon nga adlaw-adlaw nagserbisyo aron masulbad ang mga panaglalis ug mapadayon ang malinawon nga komunidad.
Miapil usab sa programa sila DILG-7 Regional Director Leocadio Trovela, DILG Cebu Provincial Director Jesus Robel Sastrillo Jr., ug Liga ng mga Barangay Cebu Chapter President ug Provincial Board Member Tining Martinez. Ilang gipasidunggan ang mga outstanding cluster heads ug city ug municipal local government operations officers tungod sa ilang maayong pagpatuman sa Katarungang Pambarangay Program.
Matud pa ni Martinez, importante kaayo ang papel sa Lupong Tagapamayapa sa pagpataliwala sa mga panaglalis sa barangay, nga makatabang sa pagpagaan sa trabaho sa hustisya. Ang LTIA usa ka tinuig nga programa nga nag-ila sa mga Lupon ug lokal nga opisyal nga nagpakita og maayong serbisyo sa pagpalig-on sa sistema sa hustisya sa barangay ug sa pagpalambo sa malinawon nga komunidad.
I via Renante Socia Lada