Usa ka Executive Order No. 22 nga gipagawas ni Cebu Gov. Gwen Garcia nga nagmando og cease-and-desist order ngadto sa Apo Land and Quarry Corporation (ALQC) nga mohunong sa tanang “earth-moving operations” sa tanan niini nga lugar nga sakop sa Mineral Production Sharing Agreement (MPSA) sa Dakbayan sa Naga sulod sa usa ka bulan, sugod Disyembre 3, 2024.
Ang ALQC mao ang dako nga supplier sa CEMEX Philippines alang sa limestone, clay, ug greywacke, nga mga hilaw nga materyales alang sa paghimo og semento sa planta niini nga anaa sa maong siyudad sa habagatan sa Sugbo.
Ang MPSA usa ka kasabutan diin ang gobyerno naghatag og eksklusibong katungod sa usa ka kontraktor nga maghimo og mga operasyon sa pag mina sulod sa gitudlo nga lugar ug mokuha og bahin sa kinatibuk-ang produksyon. Ang mga quarry operator kinahanglan mosunod sa mga hugot nga pamalaod pangkalikupan ug seguridad sumala sa nalatid sa Philippine Mining Act of 1995.
Basi sa mao gihapon nga EO, gimanduan ang ALQC nga makig -alayon sa pagpatuman sa usa ka environmental audit, kumpleto nga pag-assess sa risgo sa lugar, ug pagtino sa kapasidad sa MPSA areas.
Gipagawas ang EO 22 human masuta nga adunay panginahanglan nga ipatuman ang mga maong proseso tungod sa “klaro nga pagbalewala” sa kaluwasan sa mga lumulupyo nga nagpuyo sulod o duol sa MPSA areas. (Renante Socia Lada)
(Source: Cebu Provincial Capitol PIO)