Gipasidan-an ni Cebu Gob. Pamela Baricuatro ang mga Barangay Health Workers (BHWs) nga magpabiling naka-focus sa ilang trabaho sa paghatag og serbisyong panglawas ug dili gamiton sa politika, samtang padayon ang pagpalig-on sa health services sa komunidad.
Gibutyag sa gobernador nga dako kaayo og papel ang mga BHWs sa paghatag og basic healthcare sa barangay, busa dili angay nga maapil sila sa mga kalihokan nga may kalabotan sa politika. Matod pa niya, klaro na sa ilang ngalan nga ang ilang responsibilidad mao ang panglawas sa katawhan.
Gihimo ni Baricuatro ang maong pamahayag atol sa BHW Congress nga gipasiugdahan sa Department of Health Region 7 sa usa ka hotel sa Cebu City kagahapon Abril 14, diin nagtigum ang mga frontline health workers gikan sa nagkalain-laing lungsod ug siyudad sa probinsya.
Sa maong kalihokan, gitun-an sa mga BHWs ang ilang benepisyo ug insentibo, ingon man ang ilang papel sa mga programa sama sa PuroKalusugan ug uban pang prayoridad sa panglawas, lakip na ang pagbatok sa mga sakit, pagpalambo sa kalimpyo, pagbakuna, ug pag-atiman sa mga inahan.
Gipahayag usab sa gobernador ang iyang pasalamat sa dedikasyon sa mga BHWs ug naghatag og donasyon nga ₱100,000 alang sa mga kalihokan sa maong congress. Samtang, giingon ni DOH-7 Durector Joshua Brillantes nga dili mahimo ang lig-on nga sistema sa panglawas kung walay tabang sa mga BHWs, nga maoy naa sa unahan sa pagserbisyo sa komunidad.
Source: Cebu Province PIO
I via Renante Socia Lada