Nagpagawas og kinatibuk-ang ₱20.2 milyon nga pinansyal nga tabang ang Cebu Provincial Government alang sa mga lokal nga panggamhanan ug barangay sa tibuok probinsya. Ang maong pondo gamiton alang sa mga proyekto sa imprastraktura ug kalamboan sa komunidad.
Pinakadako nga bahin sa pondo nadawat sa Danao City nga mikabat og ₱15.5 milyon. Sa maong kantidad, ₱8 milyon igahin sa pagtukod og evacuation center sa Sitio Malinginlinao, Barangay Sibacan, samtang ₱7 milyon para sa pagtukod og barangay hall sa Dungga.
Sumala kang Governor Pamela Baricuatro, gipalabi karon sa nasyonal ug probinsyal nga panggamhanan ang diretsong paghatag og pondo sa mga komunidad aron malikayan ang korapsyon. Matod pa niya, mas maayo nga direkta na kining maabot sa katawhan.
Samtang, nakadawat usab og ₱3 milyon nga tabang ang lungsod sa Alegria. Mga ₱2 milyon ani gamiton sa pagpalit og playground facilities alang sa kabataan, ug ₱1 milyon para sa pagbutang og solar lights.
Adunay mga barangay usab gikan sa una, ikatulo, ika-upat, ikalima, ug ikapito nga distrito nga nakadawat og tabang nga nagkantidad gikan ₱50,000 alang sa socio-cultural nga kalihokan hangtod ₱200,000 para sa mga proyekto sa imprastraktura.
Source: Cebu Province PIO
I via Renante Socia Lada