Mopalit og mga breath analyzer ang Cebu City isip kabahin sa pagpalig-on sa road safety, ilabi na human sa bag-ong insidente sa Banilad. Gipahibalo kini ni Mayor Nestor Archival sa press conference niadtong Pebrero 16, 2026.
Sumala sa mayor, tukoron ang usa ka Technical Working Group (TWG) nga maoy motan-aw pila ka units ang paliton, unsay angay nga specifications, ug asa kini ipahimutang. Ang grupo maghatag usab og mga rekomendasyon aron masiguro nga husto ug epektibo ang paggamit sa maong mga kagamitan.
Ang pondo para sa pagpalit kuhaon gikan sa Peace and Order Program (POP), ilabi na sa pondo nga gigahin para sa operasyon sa kapulisan. Matod ni Archival, giandam na karon ang pagtuon aron mapalit dayon ang mga breath analyzer sa labing dali nga panahon.
Ang TWG buhaton sa mga representante gikan sa Cebu City Transportation Office, Cebu City Medical Center, Cebu City Police Office, ug Cebu City Health Department aron masiguro ang hiniusa ug komprehensibong pagpatuman sa balaod alang sa kaluwasan sa publiko.
Source: Cebu City PIO
I via Renante Socia Lada