Posibleng tukoron sa Cebu ang usa ka world-class sports complex nga mosakop og 20 ka ektarya nga yuta, human kini suportahan sa probinsyal nga gobyerno.
Gipadayag ni Gobernadora Pamela Baricuatro ang iyang suporta sa proyekto niadtong Marso 18, human sa tigum uban sa mga opisyal sa Philippine Sports Commission (PSC) ug MTD Philippines, nga maoy developer sa New Clark City sa Tarlac.
Sa presentasyon, gipakita sa MTD Philippines ang plano sa International Sports Complex nga himuong permanente nga training ug competition venue alang sa mga atleta sa Visayas. Target niini nga mahimong sentro sa pagbansay sa mga regional ug national athletes ubos sa Visayas Sports Academy.
Gipakita usab nga ang proyekto dili lang para sa sports, kundili apil usab ang usa ka modernong Provincial Government Center nga mahimong extension sa Capitol.
Ang maong complex plano nga adunay mga pasilidad para sa lain-laing sports sama sa athletics, football, aquatics, beach volleyball ug uban pa, ug tukoron sumala sa international standards.
Gitan-aw usab kini nga mahimong usa sa mga venue kung ang Pilipinas mag-host sa Asian Beach Games 2028.
Mitambong sa meeting sila PSC Chairman Patrick Gregorio ug Commissioner Edward Hayco. Sumala ni Gregorio, andam ang PSC nga pondohan ang proyekto ug nangita og partnership sa Cebu alang sa regional training center.
Gipadayag ni Gob. Baricuatro nga dako iyang suporta niini aron mapalambo pa ang sports program sa probinsya ug mapalig-on ang imahe sa Cebu isip Dancesport Capital sa nasud.
Samtang wala pa ma-finalize ang lokasyon, misugyot na si Gungun Gica nga ihatag ang 30 ka ektarya nga yuta sa Dumanjug kung didto ipatukod ang proyekto.
Source: Cebu Province PIO
I via Renante Socia Lada
Renante