Nibisita ang mga miyembro sa AIPA Organizing Committee kang Gobernador Pamela Baricuatro sa Provincial Capitol niadtong Marso 18. Ang delegasyon gipangulohan ni Maria Rachel Arenas isip kabahin sa ilang opisyal nga lakang sa pagpangandam sa umaabot nga international nga kalihokan.
Ang pagbisita kabahin sa preparasyon alang sa ASEAN Inter-Parliamentary Assembly (AIPA), diin magpahigayon og site inspection ang House of Representatives Ocular Inspection Group. Tumong niini nga masuta ang ka-andam sa mga lugar nga himuan sa mga kalihokan.
Apil sa giandam nga agenda ang 15th ASEAN-AIPA Leaders’ Interface nga ipahigayon karong Mayo 9 sa Shangri-La Mactan, ingon man ang AIPA Preparatory Meeting sa Mayo 8. Gilauman nga mutambong ang mga lider sa parlamento gikan sa lain-laing nasud sa ASEAN.
Gipadayag ni Gob. Baricuatro ang iyang bug-os nga suporta sa maong kalihokan ug giingon nga andam ang probinsya sa Cebu sa paghatag og tabang aron masiguro ang kalampusan sa AIPA events ug mapakita ang ka-andam sa lalawigan sa pag-host og international nga mga panagtigom.
Source: Cebu Province PIO
I via Renante Socia Lada