Gipalapdan ni Mayor Raymond Alvin Garcia ang pagpanghatag og insurance lakip na ang mga habal-habal drivers dinhi sa dakbayan sa Sugbo.
Kini iyang gipahibawo karong hapon, Disyembre 7, 2024 sa dul-an 4,000 ka habal-habal drivers nga nitambong sa “Habal-habal Drivers Summit & Christmas Party” nga gipahigayon diha sa South Road Properties nga gipasiugdahan ni Konsehal Pastor “Jun” Alcover, Jr.
Kahinumdoman nga gitapok sa mayor ang tanang delivery riders sa niaging buwan og gisaaran nga hatagan silang tanan og insurance nga siya mismo ang mobayad sa premium gikan mismo sa iyang bulsa.
Sama kanila, P100,000 mao unyay insurance sa mga habal-habal drivers sa dakbayan, butang nga gikalipay sa tanan.
Matud sa mayor,nga iyaha gihapon nga kaugalingong bulsa maggikan ang ibayad niya sa insurance company.
Gibutyag ni Mayor Garcia nga ang insurance kay life coverage, bast resulta lang sa aksidente; ug kung maaksidente unya maospital, adunay hangtud sa P20,000 nga coverage.
Gawas sa gipasalig nga insurance, nagpa-raffle sab si Mayor Garcia og upat ka motorsiklo, duha ka mountain bike, lima ka cellphone, ug bugas.
Kauban sa mayor sa pagtambong sa kalihokan sila si Konsehal Joel Garganera, Association of Barangay Councils President Franklyn Ong; ug Basak Pardo Barangay Captain Dave Tumulak.
(Source: EliTE)