Nahuman na sa Cebu Provincial Government ang pag-apod-apod sa cash incentives para sa 2025 sa mga barangay worker sa lungsod sa Tuburan ug Tabuelan. Usa kini ka bulan nga programa isip pagpasalamat sa ilang padayon nga pag-alagad sa komunidad.
Ang katapusang paghatag sa ayuda gihimo niadtong Enero 30, 2026, sa Tuburan Gymnasium ug Tabuelan Gymnasium. Sa maong adlaw, 429 ka barangay workers sa Tuburan ug 1,940 sa Tabuelan ang nakadawat sa ilang cash incentives.
Mitambong sa kalihokan sila Mayor Rex Gerona sa Tabuelan ug Mayor Christian Daniel Diamante sa Tuburan, kauban si 4th District Congressman Sun Shimura ug Provincial Board Member Kerrie Shimura.
Gipangunahan usab ang cash distribution team ni Chief of Staff James Canoy aron masiguro ang hapsay ug organisadong paghatag sa ayuda.
Sa kinatibuk-an, ₱212,274,000 ang giapod-apod sa tibuok probinsya sa Cebu. Lakip niini ang ₱30.9M sa 1st District, ₱19.1M sa 2nd District, ₱43.1M sa 3rd District, ₱37.5M sa 4th District, ₱40.8M sa 5th District, ₱13.8M sa 6th District (apil ang Mandaue), ug ₱26.8M sa 7th District.
Gawas sa cash incentives, nakadawat usab og mga goodies ang 37,591 ka barangay workers sa probinsya. Gisugdan ang pag-apod-apod niadtong ikaduhang semana sa Disyembre ug nahuman niining Enero 2026, apil na ang mga barangay sa Bantayan ug Camotes Islands.
Sumala sa Kapitolyo, nagpakita kini sa padayon nga pagtagad sa administrasyon ni Gov. Pamela Baricuatro sa mga barangay workers nga maoy unang motabang ug moatiman sa katawhan. Ang sayong pagkahuman sa programa nagpasabot usab nga andam na ang probinsya sa tukmang pagpatuman sa cash incentives para sa 2026.
Source: Cebu Province PIO
I via Renante Socia Lada Renante