Nagpadala og opisyal nga imbitasyon ang Fujian Provincial People’s Government sa China kang Cebu Gov. Pamela Baricuatro aron manguna sa usa ka lima ka adlaw nga pagbisita didto niining buwana. Tumong sa biyahe ang pagpalig-on sa kooperasyon tali sa Fujian ug Cebu isip sister provinces, ilabi na sa kultura, turismo, panglawas, edukasyon, ug negosyo.
Ang imbitasyon gipirmahan ni Li Lin, Director-General sa Foreign Affairs Office sa Fujian Provincial People’s Government. Sa sulat, gihisgutan ang dugay nang panag-uban sa Fujian ug Cebu, nga naglangkob sa people-to-people exchanges, traditional Chinese medicine, disaster response, ug cultural communication.
Gibutyag usab sa sulat ang suod nga komunikasyon tali ni Fujian Gov. Zhao Long ug Gov. Baricuatro, nga nagpakita sa tinguha sa duha ka lider nga palig-onon ug ipadayon ang relasyon sa ilang mga probinsya. Nagpasalamat ang mga opisyal sa Fujian sa padayon nga suporta ug kooperasyon sa Cebu ubos sa pagpangulo ni Gov. Baricuatro.
Tumong sa maong pagbisita ang pagpalambo pa sa praktikal nga kooperasyon ug ang pagpatuman sa memorandum of understanding mahitungod sa Silk Road Partnership tali sa Fujian ug Cebu.
Lakip sa mga planong bisitahon sa delegasyon ang Hongmiaoling Circular Economy Ecological Industrial Park, ang Fujian University of Traditional Chinese Medicine, ug pipila ka miting ug panihapon kauban ang lokal nga mga lider.
Gilauman nga mobiyahe ang Cebu delegation sa mga siyudad sa Zhangzhou ug Xiamen gikan Pebrero 3 hangtod 7. Manguna si Gov. Baricuatro sa delegasyon nga apil ang pipila ka miyembro sa Provincial Board.
Source: Cebu Province PIO
I via Renante Socia Lada