Nasikop ang usa ka high-value target sa iligal nga drogas sa usa ka buy-bust operation nga gihimo sa Sitio Lawis, Barangay Jugan, Consolacion, Cebu sa alas 3 sa hapon, Hulyo 28, 2025. Ang operasyon miresulta sa pagkumpiskar sa gituohang shabu nga gibanabana nga kantidad og ₱4.08 milyon.
Ang 43-anyos nga lalaki nga residente sa Liloan, Cebu, nadakpan human kini namaligya og usa ka sachet sa gituohang shabu ngadto sa undercover operative. Pagkakupot kaniya, nakit-an pa ang 25 ka dugang sachet, nga nagtotal og 26 ka sachet nga gibug-aton og 600 ka gramos.
Ang mga nakumpiskar drogas gidala sa Cebu Provincial Forensic Unit – Northern Cebu Satellite Forensic Office sa Danao City alang sa laboratory examination. Samtang ang suspetsado gipahimutang sa Consolacion MPS custodial facility, samtang giandam ang kaso batok kaniya ilawom sa Republic Act 9165, o ang Comprehensive Dangerous Drugs Act of 2002.
Gipasidunggan ni PBGEN Redrico A. Maranan, Regional Director sa PRO-7, ang tanang operatiba nga naglihok sa maong kalampusan.
“This is what happens when our units work together with focus and commitment. We get dangerous drugs off our streets. Every arrest like this sends a strong message that we are serious about keeping our communities safe and drug-free. We will keep pushing forward, one operation at a time.”
Nagpadayon ang mga awtoridad sa pakig-alayon sa ubang ahensiya sa balaod aron palig-onon ang kampanya batok sa iligal nga drogas sa Central Visayas.
Source: PRO7
I via Renante Socia Lada