Usa ka panaglalis sa manok nga gibihag human sa sabong ang misangpot sa usa ka makalilisang nga insidente diin ang maguwang napusilan patay sa kaugalingong manghod sa bukirang dapit sa Barangay Lindogon, Simala, niadtong Hulyo 27, 2025.
Giila ang biktima nga si Rechel Avila Dela Cruz, 36 anyos, usa ka poultry caretaker. Samtang ang suspek mao ang iyang 34-anyos nga manghod nga si Felix Dela Cruz, usa ka construction worker.
Sumala sa Sibonga Police Station, gikan pa sa sabungan sa Simala ang biktima ug nagdala og manok nga daug, Nagsugod ang lalis sa dihang wala apila sa pagluto ang manok nga gipanag-iya ni Felix nga namatay human sa sabong. Nahimong personal ang lalis nga misangpot sa init nga panag-away.
Nasayran nga nakainom ang biktima ug siya pa ang unang misugod og panukmag. Misulay pa og pamagbulag ang ilang amahan apan wala nakapahunong sa panagbangi.
Gisundan pa kuno sa biktima ang iyang manghod nga nagdala na og atsa, hinungdan nga napugos ang suspek sa pagpusil gamit ang .38 caliber revolver.
Nadala pa si Rechel sa tambalanan apan gideklarar nga patay pag-abot. Sa laing bahin, boluntaryong mitahan si Felix sa kapulisan ug miingon nga nidepensa lang siya sa iyang kinabuhi.
Karon, giandam na ang kasong parricide batok kaniya samtang nagpadayag siya og pagbasol sa trahedya nga nahitabo.
I via Renante Socia Lada