Nagpadayon karon ang manhunt operation alang sa mamumuno sa usa ka 64-anyos nga kanhi hepe sa tanod sa Barangay Carreta, Cebu City, nga gipatay kagahapon, Enero 12, 2025, alas 8:20 sa buntag.
Ang biktima nga nailhan nga si Johnny Lagaras, usa ka kanhi chief tanod, gipusil sa suspek gamit ang kalibre .45 nga pistola. Base sa deskripsyon sa mga testigo, ang suspek usa ka lalaki nga nagsul-ob og helmet, bonnet, camouflage nga jacket, blue nga karsones, ug puti nga sapatos. Human sa insidente, dali kining misibat gikan sa lugar sa krimen.
Nahitabo ang pagpamusil samtang anaa si Lagaras sa usa ka lugar sa Barangay Carreta. Gipusil siya kausa sa tuo nga bahin sa ulo nga maoy hinungdan sa iyang kamatayon. Bisan pa sa paningkamot sa mga medical responders nga motabang kaniya, gideklara siyang dead on the spot.
Sa pagkakaron kasamtangan gisuta pa sa mga otoridad ang hinungdan sa pagpamusil ug si kinsa ang nibuhat niini.
Gihangyo usab ang publiko nga motabang sa paghatag og impormasyon nga mahimong magamit aron madakpan ang mamumuno. Ang mga testigo gipaubos sa further inquiry aron masuta ang dugang nga detalye bahin sa insidente.
Ang publiko gipahinumdoman nga magpabilin nga alerto ug magreport dayon og mga kahina-hinalang aktibidad sa kapulisan aron malikayan ang susamang mga insidente. (Renante Socia Lada)