Usa ka kanhi personalidad sa Communist Terrorist Group (CTG) ang nadakpan sa kapulisan atol sa operasyon nga gipahigayon kadlawon sa Hulyo 29, 2025 sa Purok Beauty in the Sky, Barangay Babag, Lapu-Lapu City.
Ang operasyon gipangulohan sa Lapu-Lapu City Police Office (LCPO) ubos ni PCOL Dyan V. Agustin, uban sa tabang sa City Intelligence Unit, City Drug Enforcement Unit, SWAT, ug Regional Intelligence Division 7. Target sa search warrant mao si Janjan Biory alyas Junnefer Biore, 48 anyos, nga kanhi miyembro sa SYP GF 21-C sa NEMRC ug giilang Top 7 sa CTG watchlist sa Caraga Region.
Sa operasyon, nakuha gikan sa suspek ang usa ka .45 caliber nga armas nga adunay 35 ka buok bala, lima ka magazine, usa ka suppressor, ug mga materyales sama sa libro ni Mao Zedong ug dokumento kabahin sa rebolusyonaryo nga kalihokan.
Gipailawom dayon sa medikal nga eksaminasyon ang suspek ug karon gibantayan sa LCPO Custodial Facility samtang giandam ang kaso batok kaniya ilawom sa R.A. 10591 o ang Comprehensive Firearms and Ammunition Regulation Act.
Matod ni PRO-7 Regional Director PBGEN Redrico A. Maranan, kabahin kini sa kampanya sa kapulisan aron pugngan ang hulga sa kalinaw ug seguridad nga posibleng buhaton sa mga kanhi nga rebelde. Giingon pa niya nga samtang bukas ang gobyerno sa mga gustong mobalik sa sabakan sa balaod, ang mga mopadayon sa iligal nga lihok sigurado nga pasakaan og kaso.
Source: PRO7
I via Renante Socia Lada