Gitubag ni dismissed Mandaue City Mayor Jonas Cortes ang desisyon sa Commission on Elections (Comelec) sa pagkanselar sa iyang Certificate of Candidacy (COC), nga mahimong magpugong kaniya sa pagdagan sa sunod nga eleksyon.
Sa usa ka opisyal nga pamahayag, matod ni Cortes nga dili siya mosugot nga basta-basta kanselahon ang iyang kandidatura. Gipasabot niya nga andam ang iyang kampo sa paggamit sa tanang legal nga pamaagi aron mapadayon ang iyang plano sa pagdagan sa eleksiyon sa Mayo 2025.
Matod ni Cortes, ang desisyon sa Comelec supak sa iyang mga katungod ug personal nga determinasyon sa pag-alagad sa mga taga-Mandaue.
“Dili ko mosugot nga mapugngan ang akong kandidatura alang sa umaabot nga eleksiyon. Ang akong katungod nga mag-alagad dili lang para kanako, apan alang sa mga tawo nga misalig ug misuporta kanako. Gamiton namo ang tanang legal nga pamaagi aron mahatagan ug hustisya kini,” segon ni Cortes.
Ang pagkanselar sa COC ni Cortes konektado sa usa ka kontrobersya nga naglakip sa mga alegasyon batok kaniya nga nagresulta sa iyang pagka-dismiss sa serbisyo. Matud sa Comelec, adunay legal nga basehan ang desisyon, apan wala pa kini naghatag og dugang detalye bahin sa isyu.
Gipakita sa kampo ni Cortes ang ilang determinasyon sa pagpadayon sa kampanya. Gipanghinaot nila nga masulbad dayon ang isyu aron magpadayon siya sa iyang kandidatura alang sa pagpadayon sa mga programa ug proyekto nga maoy nakahatag og suporta sa katawhan.
Gipangayo sa kampo ni Cortes ang suporta ug pag ampo sa mga tawo samtang nag padayon ang proseso sa ilang legal nga aksyon batok sa Comelec.
Padayon nga gisubay sa publiko ang maong isyu samtang nagpaabot sa dugang nga detalye gikan sa Comelec ug sa kampo ni Cortes. (Renante Socia Lada)
(Source: Jonas Cortes)