Gipagawas sa Regional Trial Court (RTC) Branch 20 sa Cebu City ang desisyon nga nag-absuwelto sa kanhi Barangay Councilor sa Sawang Calero, Cebu City nga si Darius Bacus Borja sa mga kasong gipasaka batok kaniya niadtong 2022. Tungod niini, gikatahong makagawas na siya sa Cebu City Jail human sa dugay nga proseso sa korte.
Sumala sa desisyon ni Judge Leah Geraldes, wala matukod sa prosekusyon ang ebidensiya nga igo aron mapamatud-an ang mga pasangil, hinungdan nga napapas ang lima ka ihap sa kaso. Gipasiugda sa korte nga ang paghukom gibase sa nahimong presentasyon sa ebidensya atol sa pag-trial.
Ang reklamo gisang-at niadtong Enero 8, 2022, ug sukad niadto miagi ang kaso sa hapit upat ka tuig nga legal nga proseso. Sa maong panahon, nagpabilin sa detensyon ang akusado samtang nagpadayon ang kaso.
Human sa desisyon, gilauman nga mahuman na ang kaso sa legal nga aspeto ug makagawas ang kanhi opisyal. Ang korte mipahinumdom nga ang desisyon nagpakita sa resulta sa due process, diin ang hukom motimbang sa ebidensya nga gipresentar sa duha ka habig.
I Via Renante Socia Lada