Segon sa Cebu City PIO nga pa-imbestigaran ni Mayor Raymond Alvin Garcia ang nahitabo nga pagkatumba sa railings sa Pasil Fish Port sa Barangay Suba ning dakbayan sa Sugbo nga niresulta sa pagkamatay sa usa ka kwatro anyos nga bata niadtong Lunes, Oktubre 14, 2024.
Gisulti kini ni Mayor Garcia atol sa usa ka ambush interview kaniya sa mga sakop sa media kagahapong adlawa, Oktubre 16.
Sa maong interview, gipahibawo sab sa mayor nga nabalik na ngadto sa tag-iya ang e-bike nga gi-impound sa Cebu City Transportation Office (CCTO) nga gigamit sa paghatod sa bata ngadto sa tambalanan.
“I already ordered nga, na-impound man to, wa na, gi-release na sa tagtungod. So, okay na to siya ang e-bike na-release na siya. So, again noh, of course, there was a violation…but for humanitarian reason…akong gipa-release ang gi-impound nga e-bike. In fact, tua na sa possession sa tag-iya,” pulong ni Mayor Garcia.
Apan kung nahuwasan na ang tag-iya sa e-bike kay nabalik na kini kaniya, wala pa makalingkawas kung may sala pa sila o wala kadtong nagplastada sa railing nga natumba.
“I am calling for an investigation sa atoang MOD, Market (Operations) Division, ug sa CCTO (Cebu City Transportation Office), kay gusto gyud nakong tan-awon kung kaning ilang gibutang nga barikada was really safe, in the first place, nga maayo pagkataod,” nagkanayon si Mayor Garcia.
Matod niya, kung makita gani sa imbestigasyon nga aduna gyuy pagpabaya nga nahitabo nga niresulta sa maong insidente, ang pahamtangan gyud og disciplinary action, lakip na unya ang pagkasuspenso, sa hingtungdang kawani o mga kawani.
“Makit-an gani dayon nato nga naa gyuy negligence of the part of the employees, aw, naa gyud\y mga empleyado ani nga makakuha gyud og either disciplinary actions, even suspension, or even ipabalhin ba og laing departamento. Ako, Im very serious about that, kay dili man gud ni lalim ang nahitabo ba,” pamahayag ni Mayor Garcia.
Sa samang interview, nipadayag sab si Mayor Garcia nga personal siya nga mobisita sa haya sa bata ug sa pamilya niini ug mohatag sa iyang personal nga hinabang.
Una nang nihatag og pasiunang hinabang ang City Hall pinaagi sa Department of Social Welfare and Services (DSWS) ngadto sa pamilya sa bata kagahapon sa hapon, kanus-a gitunol ang tabang pinansiyal ug mga pagkaon alang sa haya sa bata.
Pinaagi ni Portia Basmayor, labaw sa DSWS, giabaga sab sa kagamhanan ang bayranan alang sa nitso sulod sa Calamba Public Cemetery ug ang sa lungon sa bata.
Source: Cebu City PIO
I via Renante Socia Lada