Usa ka dakong tabang sa sektor sa panglawas ang pormal nga pag-abli sa libreng Dialysis Center sa Barangay Talamban niadtong Pebrero 8, 2026. Kini nahimong posible tungod sa panagtinabangay sa Cebu City Government ug DIALMED Dialysis Center, uban sa suporta ni Atty. Renil Oliva.
Gipangulohan ni Mayor Nestor Archival ang maong kalihokan, kauban si City Councilor Sisinio “Bebs” Andales, Dr. Daisy Villa nga Head sa City Health Department, ug Barangay Captain Dario Arcilla, lakip ang mga opisyal sa barangay ug ang team sa JL DIALMED.
Ang bag-ong pasilidad adunay 10 ka dialysis machines ug maghatag og libreng dialysis services alang sa mga pasyente nga nanginahanglan og regular nga pagtambal, ilabi na kadtong kulang og ikabayad sa mahal nga medical expenses.
Matod sa mga opisyal, dako kini’g tabang aron mas mapaduol ang serbisyong panglawas sa katawhan ug aron makuhan ang kalisod nga giatubang sa mga pasyente nga nagpa-dialysis.
Gilauman nga pinaagi sa maong proyekto, mas daghan pang residente sa Talamban ug kasikbit nga barangay ang makabenepisyo ug makabaton og mas maayong kahimtangan sa panglawas.
Source: Cebu City PIO
I via Renante Socia Lada