Gidayeg sa Department of Environment and Natural Resources (DENR) ang bag-ong inisyatiba ni Cebu Governor Pamela Baricuatro bahin sa kalimpyo ug waste management sa tibuok probinsya, ug giingon nga kini usa ka positibong kalamboan alang sa Cebu.
Gipadayag kini ni DENR Assistant Secretary Norlito Eneran atol sa ilang pagbisita sa Capitol niadtong Pebrero 5, nga mao usab ang katapusang stop sa ilang imbestigasyon sa pagkahugno sa Binaliw Sanitary Landfill sa Cebu City.
Niadtong Enero 12, mipirma si Gov. Baricuatro sa Executive Order No. 3, Series of 2026, nga naghimo sa Provincial Cleanliness and Waste Management Plan isip opisyal nga giya sa kalimpyo, pagkunhod sa basura, segregation, recycling, ug composting sa tibuok Cebu.
Pinaagi usab niini, gitukod ang Provincial Solid Waste Management Board nga gipangulohan sa gobernador aron motan-aw sa implementasyon sa plano.
Atol sa miting, nangutana sila Provincial Administrator Atty. Ace Durano ug Assistant Provincial Administrator Aldwin Empaces, kauban ang mga department heads, bahin sa kahimtangan sa Binaliw Landfill, sa tabang nga gihatag sa mga biktima, ug sa solid waste management programs sa Cebu City ug sa probinsya.
Matod ni Asec Eneran, isumite nila ang ilang report kang DENR Secretary Raphael Lotilla sa dili pa matapos ang bulan. Depende sa resulta, posibleng mapasukip ang kaso batok sa mga responsable sa insidente.
Sumala ni Atty. Durano, ang Executive Order ni Gov. Baricuatro naghatag og klaro ug hiniusang giya alang sa tanang panimalay, negosyo, eskwelahan, ug mga establisemento sa turismo sa tibuok probinsya sa pagdumala sa basura.
Matod usab ni Provincial Environment and Natural Resources Office Chief Rodel Bontuyan, ang solid waste plan sa Cebu katapusang gi-review pa niadtong 2018 ug wala na dayon naprioridad sa miaging unom ka tuig, hinungdan nga nakulangan og teknikal nga tabang ang kooperasyon sa mga LGU.
Naglaum ang DENR nga ang bag-ong plano sa probinsya makatabang pag-ayo sa pag-atubang sa tinuod nga problema sa basura sa Cebu ug andam silang mohatag og teknikal nga suporta aron mas mapalambo ug maangay kini sa tinuod nga panginahanglan sa komunidad.
Source: Cebu Province PIO
I via Renante Socia Lada