Nadakpan sa mga otoridad ang usa ka 40-anyos nga babaye, kinsa anak sa kanhi mayor, sa lungsod sa Baclayon niadtong Pebrero 7, 2026, human ipatuman ang Warrant of Arrest batok kaniya may kalabotan sa kasong cyber libel.
Sumala sa kapulisan, ang warrant gipagawas sa Regional Trial Court Branch 93 sa Quezon City niadtong Enero 26, 2026, tungod sa gituohang paglapas sa Republic Act 10175 o Cybercrime Prevention Act of 2012.
Ang pagdakop gipahigayon pinaagi sa joint operation sa nagkalain-laing law enforcement units sa Bohol ubos sa OPLAN “PAGTUGIS.”
Human masikop, gidala ang suspek sa CIDG Bohol Provincial Field Unit alang sa hustong dokumentasyon ug sa pormal nga pagbalik sa warrant ngadto sa korte nga nag-isyu niini.
Padayon pa ang proseso sa kaso samtang wala pa ipagawas sa mga otoridad ang dugang detalye bahin sa alegasyon batok sa suspek.
Source: Bohol PNP
I via Renante Socia Lada