Sa Facebook page post sa Municipality of Santa Fe, Official dako nilang kasagmuyo sa mga tawo na ni panamastamas sa kinaiyahan.
Diin makita na gi hugaw-hugawan ang kabaybayunan sa mga nangaligo sa maong lugar.
Gawas ana nakuha usab sa CCTV na daghang mga naghimo og malaw-ay na mga buhat na dili angay buhaton sa pangpublikong lugar.
Nag awhag ang kagamhan na kinahanglan sundon kung unsay nakalatid sa balaod.
“Dakong kasagmuyo sa aton Lokal nga Pangagamhanan dinhi sa Santa Fe sa mga pipila nga mga katawhang nanamastamas sa kinaiyahan. Ang atong kabaybayunan, ang aton lungsod mao ang putling bahandi nga anaa atong napahimuslan. Pahimuslan ta kini sa sakto ug dili sa mga binoang.
“Pagbaton ug respeto sa uban, aron ikaw marespetoan.” Ania ang mga pipila sa mga hulagway nga nakuha sa aton CCTV Cameras mga buhat nga mga binastos ug di makiangayon nga batok sa mga balaodnon nga giluwatan.
Sa mga nagplano nga maghimo ug mga malaw-ay nga buhat sa publiko amo kamong gipahimangno-an nga daghan kita’y gipakatap nga mga CCTV Cameras sa nagkadaiyang dapit dinhi sa lungsod.
Dakong panghinaot sa aton LGU nga kining tanan dili angayng buhaton ug motuman kita sa mga nakalatid sa aton balaod.” (Renante Lada, photo courtesy of Municipality of Santa Fe, Official)