Gitataw ni Cebu City Mayor Raymond Alvin Garcia nga wala gihapoy nakita nga operasyon sa Philippine Offshore Gaming Operator (POGO) o kaha susama sa POGO nga mga kalihokan dinhi sa dakbayan sa Sugbo.
Kini human nga walay nakita ang kapulisan, inubanan sa Cebu City Business Permit and Licensing Office ug sa Criminal Investigation and Detection Group (CIDG)-7, human sa gipahigayon nga inspeksyon, nga subay sab sa gikataho sa National Bureau of Investigation (NBI)-7.
Segon sa NBI, adunay gidudahang upat ka mga dapat dinhi sa dakbayan ug sa probinsiya sa Sugbo nga aduna gihapoy operasyon o susamang operasyon sa POGO. Giiingon nga sa upat, usa ang anaa sa dakbayan sa Sugbo.
“So, ato nang gipatan-aw with the BPLO, together with the Philippine National Police, together with CIDG. Apparently, pag-inspect didto wa silay nakit-an nga POGO-like activities sa ilang gi-inspect-kan. So, as of now, we are still safe to say nga Cebu City is POGO-free. Cebu City is POGO-free and is also POGO-like-free,” pamahayag ni Mayor Garcia.
“Wala silay nakita nga mga POGO operations or POGO-like operations. Otherwise, nahibawo na mo, di ba, pag-raid. Hagbay ra mahibawo na dayon mo,” dugang niya.
Una nang gisulti ni Mayor Garcia nga daghan na sila og mga nadunggan nga adunay kalihokan nga susama sa POGO dinhi sa dakbayan apan inig-adto sa mga sakop sa task force nga iyang giumol aron mosubay niini wala silay makit-an.
Gipasalig hinuon sa mayor nga bisan pa niini, wala gihapon mokompiyansa ang dakbayan sa kanunay nga pag-aninaw batok sa posibleng operasyon sa POGO dinhi.
Source: Cebu City PIO
I via Renante Socia Lada