Nagplano karon nga magpagawas og executive order si Cebu City Acting Mayor Raymond Alvin N. Garcia isip kamanduan sa pag-umol og “Task Force Pabalay”.
Tinguha sa maong task force ang paghatag og unang pagtagad sa katumanan sa mga programa sa pabalay sa Kagamhanan sa Dakbayan sa Sugbo.
Kini human sa gipatawag nga tigom kagahapong adlawa, Hulyo 23, 2024, ni Konsehal Jerry Guardo, ang labaw sa Committee on Infrastructure sa Konseho sa Dakbayan, aron tukion ang maong programa.
Atol sa maong tigum didto ang taga Department of Human Settlements and Urban Development (DHSUD) Officer-in-charge Lyndon Juntilla, tinugyanan sa Pagibig Miriam Lloren, Division for the Welfare of the Urban Poor Head Ronald Anthony Librando, Engr. Lowell Corminal sa Department of Engineering and Public Works, Atty. Janeses Ponce sa Land Management Office, Architect Michael Espina ug Architect Eleazar Lipang sa City Planning and Development Office.
Gituki sa maong tigom ang mga programa sa pabalay sa dakbayan, ilabi na ang transitional housing program alang sa mga gitawag nga Informal Settler Families (ISF).
Lakip usab sa gihisgotan ang 4PH Program sa mga barangay sa Binaliw ug sa Pulangbato, ang Budlaan Valley Resettlement Area, ug ang Camp Marina Resettlement Area.
Sa nasayran, gigahinan na og P600 milyones ang pagtukod sa transitional housing, nga temporaryong papuy-an sa mga ISG nga maapektohan sa istriktong pagpatuman sa paghawan sa tres metros nga easement sa mga kasapaan, ingon man kadtong gipapahawa na mga mga nagpuyo og pribadong mga luna.
Giklaro usab ni Acting Mayor Garcia nga Martes kada semana na ang tigom sa Task Force, kansang mga sakop mao ang hingtungdang mga buhatan sa kagamhanan ug ang DHSUD ug ang Pag-ibig. (Renante Socia Lada)
(Source: Cebu City PIO)