Usa ka komprehensibo nga diskusyon ang gihimo kagahapong adlawa, Septembre 18, 2023, sa siyudad sa Mandaue.
Diin ang mga opisyalis sa dakbayan sa Mandaue, siyudad sa Sugbo ug ubang ahensya sa goberno nagtagbo aron mahisgutan ang nagkagrabing problima sa baha nga nasinati sa duha ka siyudad.
Si Mandaue City Mayor Jonas Cortes nihangyo sa Department of Public Works and Highways (DPWH) nga himuon ang dinaliang lakang may labot sa pagsulbad sa baha.
Tinguha ni Cortes nga mohimo og paspas nga aksyon ang maong ahensya labi na sa declogging, desilting sa mga manhole ug drainage.
Hinuon sa habig sa DPWH nagpadayon sa ilang proyekto sa Butuanon River labi na sa drainage aron malikayan ang pag awas niini.
Usa usab ka roundtable discussion sa kagamhan sa siyudad sa Mandaue ug dakbayan sa Sugbo diin nagpirmahay sila sa usa ka kasabutan sa Beyond Border aron masulbad ang mga problema sa baha.
Nagpadayon usab pag awhag ang mga opisyalis ngadto sa katawhan nga magtinabangay ug mahimong responsabli sa paglabay sa basura para masulbad ang isyu ug problema sa kumunidad. (Renante Socia Lada, photo courtesy of Mandaue City PIO)