Patay ang usa ka Indian national samtang naanggol ang kaubanan niini sa aksidente nga nahitabo sa National Highway, Brgy. Langtad, Argao, Cebu kagahapon sa hapon, Marso 30, 2025.
Ang nalambigit sa maong disgrasya mao ang usa ka motorsiklo nga Suzuki Burgman motorcycle nga gimaneho ni Suman Surjit, 45 anyos, Indian national nga taga Brgy. Tulic, Argao, Cebu.
Samtang ang backrider niini kinsa nakalas mao si Kuldip Kumar, 51 anyos, usa usab ka Indian national, gidala pa sa Isidro Kintanar Memorial Hospital (ICKMH) apan nakutloan kini sa kinabuhi tungod sa Hemorrhagic Shock.
Laing motorsiklo pa ang nalambigit mao ang Yamaha Aerox nga gimaneho ni Analisa Gonzaga Narbasa, 39 anyos, live-in partner ni Surjit, residente usab sa Brgy. Tulic, Argao, Cebu.
Ang Ceres bus gimaneho ni Fernando Sarno Malabago Jr., 36 anyos, taga Brgy. Linuthangand, Canlaon City, Negros Oriental.
Matud sa imbestigasyon, nagbiyahi ang tanang sakyanan padulong sa habagatang direksyon diin si Surjit ug Narbasa nagdagan nga nagtapad samtang nag-istoryahanay. Sa dihang misulay og overtake ang bus nga gimaneho ni Malabago, nawad-an og kontrol si Surjit ug natumba ang motor. Ang back rider nga si Kumar nasampig sa bus ug naguroy sa ligid sulod sa 40ft o (40 ka tiil) nga miresulta sa grabeng kadaot.
Gitabang sa Argao MDRRMO ang mga biktima ug gidala sa ospital apan gideklarar nga Dead On Arrival si Kumar sa doktor nga si Dr. Marcelito Fernandez Jr.
Ang drayber sa motor nga si Surjit gibalhin sa Carcar District Hospital alang sa dugang medikasyon samtang si Malabago gidala sa Argao Police Station alang sa imbestigasyon. (Renante Socia Lada)