Nasakmit sa Bogo City Police Station ang usa ka iligal nga pusil ug mga bala atol sa pagpatuman og search warrant niadtong nakalabay nga adlaw sa Purok Cuba, Barangay Libertad, Bogo City.
Sa maong operasyon, nadakpan ang suspetsado nga nailhang alias “Jomar,” 37 anyos, minyo ug empleyado sa pribadong kompanya, sa maong barangay.
Ang search warrant gipagawas tungod sa paglapas sa Republic Act 10591 o ang Comprehensive Firearms and Ammunition Regulation Act. Gipirmahan kini ni Executive Judge Cesar M. Madeja sa RTC Branch 80 sa Bogo City.
Lakip sa mga nasakmit mao ang usa ka caliber .45 nga pusil, unom ka buok live ammunition sa maong kalibre, usa ka steel cabinet, ug usa ka itom nga belt bag. Ang tanang ebidensya gimarkahan ug giimbentaryo sa lugar sa operasyon sa presensya sa suspetsado, usa ka opisyal sa barangay, ug miyembro sa media, subay sa balaod.
Gipasidunggan ni Provincial Director PCOL Abubakar Udang Mangelen Jr. ang mga operatiba tungod sa ilang dedikasyon ug pagsunod sa hustong pamaagi sa operasyon. Matud niya, nagpakita kini sa padayon nga kampanya batok sa mga loose firearms aron masiguro ang kalinaw ug kaluwasan sa komunidad.
Sa pagkakaron, anaa sa kustodiya sa Bogo City Police Station ang suspetsado ug atubangon niya ang kaso tungod sa paglapas sa RA 10591.
Source: CPPO
I via Renante Socia Lada