Nasikop sa Toledo City Police Station ang usa ka 24-anyos nga lalaki human makuhaan og ilegal nga armas sa Sitio Kapasad, Barangay Dumlog, Toledo City sa nakalabay nga kadlawon.
Sumala sa kapulisan, nakadawat sila og report gikan sa usa ka concerned citizen mahitungod sa usa ka armado nga tawo nga hubog ug naghimo og kagubot sa ilang lugar. Tungod niini, dali nga mitubag ang mga police personnel ug nagpahigayon og preventive patrol operation sa maong lugar.
Sa pag-abot sa mga kapulisan, nasakpan sa akto ang suspek nga nagkupot og armas nga walay legal nga papeles o lisensya. Giila ang nadakpan nga ulitawo, walay trabaho, ug residente sa maong sitio.
Narekober gikan sa suspek ang usa ka caliber .357 revolver nga walay serial number ug duha ka buhing bala. Gidala dayon sa police station ang suspek aron atubangon ang kaso nga may kalabutan sa illegal possession of firearms.
Matud ni ATTY./PLTCOL Verniño B. Noserale, OIC sa Toledo CPS, padayon nilang gipakusgan ang kampanya batok sa mga ilegal nga armas aron masiguro ang kalinaw ug kaluwasan sa komunidad. Dugang pa niya, pinaagi sa mas hugot nga patrol operations ug police visibility, mas mapanalipdan ang mga residente batok sa posibleng krimen ug peligro.
I via Renante Socia Lada