Nasikop ang usa ka 44-anyos nga lalaki sa mga sakop sa Argao Municipal Police Station tungod sa paglapas sa Republic Act No. 10591 o Comprehensive Firearms and Ammunition Regulation Act niadtong Pebrero 25, 2026 sa Barangay Panadtaran, Argao, Cebu.
Ang suspetsado nga nailhan lang sa alyas nga “Michael,” ulitawo ug walay trabaho, nadakpan human adunay mitawag nga concerned citizen nga nagtaho bahin sa usa ka armadong lalaki nga naghasol ug nagpakurat sa mga residente samtang naglibot sa barangay nga nagdala og pusil.
Sumala sa imbestigasyon, dali nga mitubag ang kapulisan sa nadawat nga report ug ilang nakit-an ug nadakpan ang suspetsado. Narekober gikan kaniya ang usa ka caliber .45 pistol nga may marka nga “Government Colt Automatic Caliber .45,” usa ka steel magazine, ug siyam ka buok live ammunition sa maong kalibre.
Gidayeg ni Provincial Director Abubakar Mangelen Jr. ang paspas nga aksyon sa Argao MPS ug gipasiugda ang kamahinungdanon sa kooperasyon sa komunidad aron mapadayon ang kalinaw ug kahapsay.
Matud pa niya, dili tugotan sa kapulisan ang mga tawo nga magdala og ilegal nga armas nga makapahulga sa kaluwasan sa publiko. Giandam na ang tukmang kaso batok sa suspetsado.
Source: CPPO
I via Renante Socia Lada