Gipusil patay ang usa ka ilado nga mekaniko sa Toledo City, Cebu niadtong Enero 9, 2025, pasado alas 3:00 sa hapon, samtang naa siya sa iyang shop sa Sitio Chapel, Barangay Cabitoonan.
Giila ang biktima nga si Christian Lagnason Tolibao, 44-anyos, minyo, residenti rapud sa maong lugar diin nahitabo ang krimen.
Base sa mga testigo, naglingkod si Tolibao sa usa ka bangko ug nag-ayo sa iyang shop dihang miabot ang duha ka lalaki sakay sa motorsiklo. Usa kanila mikanaug ug miduol biktima sa biktima dayong pusil.
Ang biktima gidala pa sa Toledo City Hospital apan gideklarar nga dead on arrival.
Usa ka testigo mihingalan sa usa sa mga suspetsado nga si alias “Jaybee” nga padayong gisusi sa kapulisan ang background niini.
Sa pagkakaron ang Toledo City Police Station nagpadayon sa ilang imbestigasyon aron mahibal-an ang motibo ug madakpan ang mga mamumumo. (Renante Socia Lada)