Malampuson ug malinawon nga gisugdan ang Fiesta Señor 2025 pinaagi sa penitensyal nga “Walk with Jesus” dawn procession ug unang novena mass kagahapon, Huwebes, Enero 9, sa Fuente Osmeña Circle paingon sa Basilica Minore del Sto. Niño. Kini nagtimaan sa pagsugod sa ika-460 nga Fiesta Señor ug Sinulog Festival 2025.
Gibanabanang 160,000 ka deboto ug security personnel ang mitambong sa maong kalihokan, nga nagsugod alas-4:00 sa buntag. Ang prusisyon gisugdan gikan sa Fuente Osmeña Boulevard hangtod sa Basilica, nga nagpakita sa hugot nga debosyon ug suporta sa komunidad alang sa Sto. Niño.
Ang PRO7 Task Force Fiesta Señor sa Sinulog 2025, uban ang kapin sa 1,904 ka security personnel, nagpahimutang og siguridad sa mga agianan nga lugar, lakip ang entry ug exit points aron masiguro ang kahapsay ug kaluwasan.
Matod ni PBGen Dionisio B. Bartolome, Jr., Officer-in-Charge sa Police Regional Office 7, nga walay mga dakong insidente nga nahitabo atol sa kalihokan. Gipakusgan ang mga siguridad nga lakang nga nakatabang sa kalampusan sa maong prusisyon.
Ang “Walk with Jesus” dawn procession mao ang opisyal nga pagsugod sa Sinulog season sa Cebu. Karong tuiga, ang tema sa ika-460 nga Fiesta Señor mao ang “Santo Niño: Paglaum sa Nagapanaw nga Simbahan,” nga nagapasiugda sa dakong pagtuo ug panalangin nga gihatag sa Santo Niño sa katawhang Pilipino. (Renante Socia Lada)
(Source: PRO-7)