Gipasidunggan ni Police Brigadier General Redrico Atienza Maranan ang mga kapulisan sa Police Regional Office 7 (PRO7) tungod sa malinawon ug walay insidente nga pagdumala sa mga rally ug panagtapok sa Central Visayas atol sa ika-40 anibersaryo sa EDSA People Power Revolution, kagahapong adlawa.
Sumala kang Maranan, nahimong hapsay ang mga kalihokan tungod sa maayong pagpatuman sa ilang security plan. Apil niini ang sayo nga pagdeploy sa kapulisan, hugot nga seguridad sa lugar, maayong pagdumala sa trapiko ug panon sa katawhan, koordinasyon sa ubang ahensya, ug pagbutang og police assistance desks ug medical teams. Gisunod usab ang “maximum tolerance” aron maprotektahan ang katungod sa mga tawo sa malinawon nga pagtapok.
Gipasalamatan usab niya ang kooperasyon sa mga partisipante ug organizers nga nisunod sa mga balaod ug regulasyon, lakip ang pagkuha og mga permit ug pagsunod sa mga sabot nga lagda, nga nakatabang sa hapsay nga dagan sa kalihokan.
Matod pa ni Maranan, ang propesyonalismo sa mga pulis nakatabang aron makapadayag ang katawhan sa ilang baruganan nga malinawon ug walay kagubot.
Gipasalig sa PRO7 nga magpadayon sila sa pagpanalipod sa demokrasya samtang gipadayon ang kalinaw ug kahapsay sa rehiyon, uban ang kooperasyon sa publiko.
Source: PRO7 PIO
I via Renante Socia Lada
#rpndykccebu