Aktibong mituman og nagpakita suporta si Governor Darel Dexter Uy sa observance sa National Pulmonary Rehabilitation Day nga ginasaulog matag ikatulong Miyerkules sa Hunyo, isip kabahin sa nasudnong panawagan sa pagpalambo sa kahimsog sa baga.
Ang pagsuporta sa gobernador nagsunod sa giya sa Department of the Interior and Local Government (DILG) pinasikad sa Presidential Proclamation No. 1104, nga nagdeklarar sa maong adlaw aron mapataas ang kahibalo sa publiko bahin sa pulmonary rehabilitation ug respiratory health.
Gimando ni Gov. Uy ang tanang may kalabutan nga buhatan sa probinsya nga makigtambayayong sa maong inisyatiba ug mosalmot sa mga kalihukan nga nag-awhag sa pag-atiman sa baga. Lakip niini ang pagpalig-on sa kampanya batok sa panigarilyo ug paggamit sa vape.
Sumala sa probinsyal nga pangagamhanan, ang maayong kahimtang sa baga mahinungdanon sa paghatag og oxygen sa lawas ug pagpagawas sa carbon dioxide, busa kinahanglan kining panalipdan batok sa impeksyon ug mga sakit sama sa ubo ug pulmonya.
Giawhag usab ang publiko sa paglikay sa bisyo, pag-ehersisyo kanunay, ug pagmintinar sa limpyo nga palibot aron mapreserbar ang maayong respiratory health.(IKEN B. GULLEM)
Source: Zamboanga del Norte Provincial News Network