Sa pagtimaan sa ika-20 nga tuig sa City-Wide Clean-Up Drive, gipangunahan sa lokal nga kagamhanan sa Sugbo ang usa ka dakong pagpanglimpyo, sogod kagahapon ug hangtod karong Hunyo 22, 2025, uban ang Coastline Management Board (CMB) ug mga miyembro sa komunidad gikan sa nagkadaiyang sektor.
Gisugdan ang kalihokan pinaagi sa usa ka opening ceremony sa Sitio Mahayahay, Barangay Pasil. Gitambongan kini ni Acting Mayor Dondon Hontiveros, uban ang mga kapitan ug konsehal sa barangay Pasil ug Suba, si Hon. Joel Garganera gikan sa Konseho sa Dakbayan, ug mga opisyal sa DILG. Gidasig nila ang tanang sektor nga managhiusa alang sa paglimpyo sa coastal areas ug mga kasapaan sa syudad.
Lakip sa kalihokan ang paghinlo sa basura sa daplin sa suba ug baybayon, ilabi na sa mga barangay nga duol sa dagat. Tumong niini ang pagsulbad sa mga problema sa basura, pagbaha, ug polusyon nga nag-apekto sa kahimtang sa palibot sa Sugbo.
Gipadayag ni CMB Chairman Ed Karlon N. Rama ug Executive Director Bernard U. Maraasin ang ilang bug-os nga suporta sa kalihokan. Ilang gipasabot nga ang panaghiusa tali sa lokal nga gobyerno ug katawhan maoy yawe aron makab-ot ang tinuod nga kalamboan ug proteksyon sa kinaiyahan.
Ang City-Wide Clean-Up Drive usa ka tinuig nga programa nga nagtumong sa pagpukaw sa kahibalo sa kahinungdanon sa pagdisiplina sa basura ug pag-amuma sa kalimpyo sa palibot.
I via Renante Socia Lada