Usa ka High-Value Individual (HVI) ug iyang kauban ang nadakpan sa Cebu Police Provincial Office (CPPO) sa usa ka buy-bust operation sa San Francisco karong Marso 22, 2026.
Ang mga nadakpan nailhan sa alias nga “Son,” 39 anyos ug walay trabaho, ug “Jai,” 23 anyos nga mananagat. Silang duha residente sa Sitio Bokok, Barangay Northern Poblacion sa maong lungsod.
Gipahigayon ang operasyon sa Barangay Consuelo sa alas 11:05 sa buntag pinaagi sa mga operatiba sa Municipal Drug Enforcement Unit sa San Francisco Police. Nakuha gikan kanila ang mga 205 gramos nga gidudahang shabu nga adunay kantidad nga moabot og ₱1,394,000.
Sa pagkakaron, gitanggong sa police custodial facility ang mga suspek samtang ang nakumpiskar nga drogas gidala na sa forensic unit alang sa eksaminasyon. Giatubang nila ang kaso sa paglapas sa Comprehensive Dangerous Drugs Act of 2002.
Gidayeg ni PCOL. Abubakar Udang Mangelen Jr., Provincial Director sa CPPO, ang kalampusan sa operasyon. Matod niya, padayon nilang palig-onon ang kampanya batok sa ilegal nga drogas ug targeton ang mga dagkong personalidad nga nalambigit niini.
Gisuportahan usab sa Kagamhanan sa Probinsya sa Sugbo ang paningkamot sa kapulisan ug mipadayag nga magpadayon ang kooperasyon aron masiguro ang kalinaw ug kaluwasan sa mga Sugboanon.
Source: CPPO
I via Renante Socia Lada