Nadakpan sa mga operatiba sa Sawang Calero Police Station 6 ang usa ka bag-ong nailhang High-Value Individual (HVI) atol sa buy-bust operation nga ilang gihimo sa Brgy. Sawang Calero, Cebu City, niadtong Marso 3, 2025.
Ang nadakpan mao ang usa ka 24-anyos nga residente sa maong barangay, kinsa nasikop human mapalitan og ginadiling drogas ang undercover operative sa Station Drug Enforcement Unit (SDEU) nga pinangulohan ni PCPT GIANN KARLO M. REYES, Officer-in-Charge sa Sawang Calero Police Station.
Sa maong operasyon, nasakmit sa kapulisan ang 1,025 gramos nga gituhuang shabu nga nagkantidad og ₱6,970,000, base sa Dangerous Drugs Board (DDB) valuation.
Giluwatan dayon ang nadakpan ug gibalhog sa kapulisan samtang nagpaabot sa kaso nga ipasaka batok kaniya ubos sa Sections 5 ug 11, Article II sa RA 9165 o Comprehensive Dangerous Drugs Act of 2002.
Si PCOL ENRICO E. FIGUEROA, ang Acting City Director sa Cebu City Police Office (CCPO), mipadayag nga padayon ang ilang kampanya batok sa ilegal nga drogas, nga usa sa ilang gipasiugda aron mapalig-on ang kasiguruhan sa syudad.
Gitumbok usab niya nga ang CCPO usa sa mga labing maayong nagperform nga police office ilawom sa
Police Regional Office 7, nga nagpaluyo sa programa ni PBGEN REDRICO A. MARANAN nga nagtinguha sa mas lig-on nga presensya sa kapulisan, paspas nga pagresponde, ug aktibong pagpugong sa krimen.
Ang nakumpiskar nga ebidensya gipaubos na sa eksaminasyon sa Regional Crime Laboratory Office 7.
Ang kapulisan nag-awhag sa katawhan nga suportahan ang kampanya batok sa ilegal nga drogas ug ipaabot dayon sa otoridad ang bisan unsang impormasyon nga makatabang sa ilang operasyon. (Renante Socia Lada)
(Source: CCPO)