Nagpahigayon og usa ka bulan nga selebrasyon ang Police Regional Office 7 (PRO7) alang sa Women’s Month karong Marso 2025, nga nagpalig-on sa ilang suporta sa katungod sa kababayen-an ug inklusibong kalamboan.
Nagsugod kini, adlaw na Lunes, Marso 3, 2025, nga may temang “WE for Gender Equality and an Inclusive Society” – usa ka tema nga nagpalapad sa tumong sa Magna Carta of Women (Republic Act 9710) aron palig-onon ang kababayen-an ug ipasaka ang gender equality. May sub-theme usab kini nga “Babae sa Lahat ng Sektor, Aangat ang Bukas sa Bagong Pilipinas.”
Sa opening ceremony, si Siquijor Police Provincial Office Provincial Director PCol Emelie Santos maoy pinasidunggang dinapit nga bisita. Gipakita sa PRO7 ang ilang pag-ila sa talagsaong mga kababayen-ang pulis nga nagpakita og maayong serbisyo ug kahanas sa ilang buhat.
Medalya ng Kagalingan (PNP Medal of Merit) – Gidawat ni PLTCol Maila Maramag sa Cebu City Police Office (CCPO) tungod sa iyang pagpangulo atol sa Sinulog Festival.
Medalya ng Kasanayan (PNP Efficiency Medal) – Gidawat sa mga Women and Children Protection Desk Investigators nga nakatampo sa taas nga crime clearance rate. Lakip dinhi sila PEMS Rowena Santillan (CPPO), PCMS Janice Tano (BPPO), ug PMSg Marjorie Flores (SPPO).
NUP Indira Babe Cagata sa Regional Learning and Doctrine Development Division nakadawat usab sa maong medalya tungod sa iyang kontribusyon sa competency training programs, nga nakamugna og 100% success rate sa PRO7’s Master Training Action Plan.
Medalya ng Papuri (PNP Commendation Medal) – Gihatag kang Patrolwomen Ma. Jennifer Dy sa City Mobile Force Company ug Amabelle Feliciano sa City Drug Enforcement Unit, Mandaue City Police Office (MCPO) tungod sa ilang kalampusan sa kampanya batok sa ilegal nga drogas.
Sa iyang pamahayag, PCol Santos mipasiugda sa kahinungdanon sa pag-ila sa papel sa kababayen-an sa serbisyo ug ang pagpasiugda sa mga polisiya nga mosuporta sa working mothers sa kapulisan.
PRO7 Regional Director PBGen Redrico Maranan mipadayag sa iyang pagsuporta sa gender equality sa “Bagong Pilipinas”.
Ang PRO7 magpahigayon og nagkalain-laing keynote speeches, workshops, ug panel discussions nga magpasiugda sa women’s empowerment ug paghisgot sa mga kritikal nga isyu sa katilingban. (Renante Socia Lada)
(Source: PRO7-PIO)