Mikalas og duha ka suspetsado human sa operasyon sa kapulisan sa Barangay Dampas, Tagbilaran City, sayo sa buntag kagahapong adlawa, Oktubre 22. Ang operasyon kay kabahin sa padayong kampanya sa Police Regional Office 7 (PRO7) batok sa mga grupo nga nalambigit sa “gun-for-hire” ug iligal nga drogas.
Sumala sa report, ang mga pulis sa Tagbilaran City Police Station misulay pag-serve og warrant of arrest batok kang alias “Ondoloy,” nga Top 2 Most Wanted Person sa Bohol tungod sa kasong Murder ug Frustrated Murder. Apan, imbes mosurender, gipabuthan daw sa mga suspetsado ang mga pulis, hinungdan nga mibalos og pusil ang kapulisan.
Human sa engkwentro, duha ka suspetsado, lakip na si Ondoloy ug ang kauban nga nailhan nga si Francis ang napatay. Nakumpiskar sa mga awtoridad ang usa ka .45 caliber pistol, usa ka KG9 submachine gun, pipila ka pakete sa gituohang shabu, ug usa ka silver nga Toyota Vios nga walay plaka.
Si Ondoloy giingong usa sa mga lider sa lokal nga drug trade ug may kalambigitan sa daghang pagpamusil sa Tagbilaran ug ubang lungsod sa Bohol. Gituohan usab nga siya ang mastermind sa usa ka drug-related shooting nga nahitabo sa Barangay Ubujan niadtong Hunyo 2024.
Matod ni PBGEN Redrico Maranan, Regional Director sa PRO7, dako kining kalampusan alang sa kalinaw ug seguridad sa Bohol. “By disrupting an active illegal drug network and an emerging gun-for-hire group, this operation will greatly improve the peace and order situation in Tagbilaran City and strengthen public confidence in our law enforcement efforts.”
Padayon karon ang imbestigasyon ug pagproseso sa Bohol Provincial Forensic Unit aron makuha ang dugang ebidensya ug impormasyon kalabot sa operasyon.
Source: PRO7 PIO
I via Renante Socia Lada