Wala nay kinabuhi nga niabot sa tambalanan ang usa ka hubog nga lalaki human gidunggab.
Ang maong krimin nahitabo pasado alas 12:00 kagahapon sa udto, Decembre 10, 2022, didto sa Sitio Tubig, Barangay Matab-ang, Dakbayan sa Toledo.
Giila ang biktima nga mao si Alex Bitoon Tingal, 41 anyos ang panuigon,menyo, kasamtangang nagpuyo sa maong lugar ug lumad nga taga siyudad sa Lanao.
Naila usab ang suspetsado nga mao si Dennis Magdusa, 36 anyos ang panuigon, nagpuyo sa naasoy nga lugar.
Sa inbestigasyon nga gihimo sa Toledo City Police Station pinanguluhan sa ilang hepe nga mao si Police Lieutenant Colonel Dennis De Guzman nasayran nga nag inum ang biktima sa gawas sa balay sa suspetsado.
Sa pagkahubog na ni Tingal nagmaoy kini og nangitag away, gisuwayan sa pagpakalma sa uyuan sa suspetsado apan siya naman hinuon ang gisukmag.
Nang laban ang mga pag umangkon niini ug si Magdusa nikuha og hait nga hinagiban og gidunggab ang biktima nga naigo sa iyang likod na maoy hinungdan sa iyang kamatayon. (Renante Lada)