Nagpahibalo ang Police Regional Office 7 (PRO7) sa temporaryong pagsuspinso sa permit sa pagdala og armas ug pagpatuman sa gun ban isip kabahin sa seguridad alang sa ika-48 nga ASEAN Leaders’ Summit.
Ang maong lakang gisunod sa direktiba sa Philippine National Police (PNP) aron masiguro ang kaluwasan sa maong international nga kalihokan.
Sumala sa PRO7, magsugod ang gun ban alas 12:01 sa kadlawon sa Mayo 4 hangtod alas 11:59 sa gabii sa Mayo 11, 2026. Sakop niini ang Lapu-Lapu City, Mandaue City, Cebu City ug tibuok Cebu.
Apil sa gisuspinso ang tanang permit sa pagdala og armas gawas sa balay, transport sa armas ug eksplosibo, ug bisan ang operasyon sa firing ug shooting ranges. Gisuspinso usab ang mga lisensya sa paghimo ug pagbaligya og firecrackers ug pyrotechnic devices.
Sa panahon sa gun ban, ang mga miyembro lamang sa Philippine National Police, Armed Forces of the Philippines, ug ubang law enforcement agencies nga naa sa opisyal nga katungdanan ug naka-uniporme ang tugotan sa pagdala og armas.
Matod ni PBGEN Arnold E. Abad, kini nga lakang kabahin sa gipalig-on nga seguridad ug panagtinabangay sa lain-laing ahensya ug lokal nga gobyerno aron masiguro ang malinawon ug hapsay nga ASEAN Summit.
Gihangyo usab sa PRO7 ang publiko nga magpabiling alerto ug mo-report dayon sa kapulisan kung adunay kadudahang lihok, aron magtinabangay ang tanan sa pagpanalipod sa seguridad sa Central Visayas.
Source: PRO7 PIO
I via Renante Socia Lada