Usa ka makalilisang nga insidente ang nakapakurat sa mga residente sa Purok Lumboy, Panangban, Compostela, Cebu, alas 2:00 sa kaadlawon, Marso 31, 2025, diin duha ang patay samtang tulo ang nasamdan human sa usa ka brutal nga pagpangtigbas nga gituohang gibuhat sa usa ka lalaki nga nalango sa ginadiling drogas.
Sumala sa imbestigasyon, misulod ang suspek sa balay sa usa ka 68-anyos nga babaye ug dayon gipanigbas kini ug ang 5-anyos nga apo, nga namatay diha-diha dayon. Wala makuntento, ningbalhin ang suspek sa laing balay ug didto gitigbas ang tulo ka laing biktima, nga nakaangkon og mga samad tinigbasan.
Sa pagresponde sa kapulisan sa Compostela, ilang nasakpan nga patay na ang duha ka biktima samtang ang tulo pang mga samaran gidali og dala sa Cebu Provincial Hospital sa Danao City.
Sa ilang paspas nga operasyon, nadakpan gilayon ang suspek nga giila nga si Jayson Meca Avila, 41-anyos, residente sa maong dapit. Narekober sa mga otoridad ang mahait nga hinagiban nga gigamit sa maong krimen.
Padayon ang imbestigasyon sa kapulisan aron matino ang hinungdan sa insidente ug masuta kung adunay laing personalidad nga nalambigit sa krimen. (Renante Socia Lada)