Patay ang usa ka 16-anyos nga Grade 10 student sa Balamban, Cebu human kini magpusil sa kaugalingon atubangan mismo sa iyang inahan sa alas 11:45 sa gabii, Biyernes, Agosto 8, 2025. Ang biktima nga babaye dali kining gidala sa tambalanan apan gideklarar nga patay pag-abot sa Vicente Sotto Memorial Medical Center sa Sugbo.
Base sa imbestigasyon sa Balamban Police Station, gisugdan sa inahan ang pagbadlong sa anak pinaagi sa tawag sa cellphone tungod sa reklamo sa amahan nga dili kini mouli og sayo ug sa impormasyon gikan sa maestra nga pirme na kini nag-cutting classes. Ang inahan misulti pa nga iya pa kini gikasab-an pag-uli sa balay.
Sa dihang nakauli ang inahan gabii sa Biyernes, giadto niya ang kwarto sa anak. Nakita niya nga ang duha ka kamot niini naa sa luyo. Human niya sultihan nga mag-estorya sila sa sunod adlaw, gikuha sa biktima ang armas gikan sa likod ug giti-on sa ulo dayon gikablit ang gatilyo, samtang ang inahan napatid sa kakurat ug wala dayon makalihok.
Wala masiguro sa pamilya kung diin gikan ang armas nga gigamit sa insidente. Ang amahan mitug-an sa kapulisan nga wala kini makakuha sa armas human sa hitabo tungod giuna nila ang pagluwas sa anak. Pagbalik nila sa balay, wala na nila masuta kung kinsa ang mihipos sa maong pusil.
I via Renante Socia Lada