Nagpadayon ang suspensyon sa klase karong Hulyo 24 sa mga lungsod sa Bantayan ug Madridejos tungod sa padayon nga hinay hangtod kusog nga ulan nga dala sa Tropical Depression “Kiyapo.”
Sa Madridejos, ang suspensyon naglangkob sa tanang lebel sa publiko ug pribadong eskwelahan. Sa Bantayan, ang klase sa mga pampublikong eskwelahan suspendido usab, samtang gitugotan ang mga pribadong eskwelahan nga sila na ang magdesisyon kon ipadayon o ipahunong ang ilang klase.
Samtang, gipahibalo sa lokal nga gobyerno sa Santa Fe nga mobalik na ang klase sugod karong adlawa. Aron masiguro ang kaluwasan sa mga estudyante, maghatag usab sila og libreng transportasyon alang sa mga nagpuyo sa mga barangay sa Balidbid, Okoy, Talisay, NHA-Marikaban, ug Pooc.
Gihangyo sa mga lokal nga opisyal ang publiko nga padayon nga bantayan ang mga opisyal nga pahibalo sa ilang tagsa-tagsa ka LGU ug mag-amping sa dili pa mogawas sa balay tungod sa padayon nga dili maayong panahon.
I via Renante Socia Lada