Gipasigarbo ni Governor Pam S. Baricuatro ang mga responders sa Provincial Disaster Risk Reduction and Management Office (PDRRMO) ug ubang mga rescue team tungod sa ilang kusgan, matinabangon, ug walay pagduhaduha nga serbisyo atol sa linog nga mihapak sa Sugbo.
Pagkahuman dayon sa linog, ang PDRRMO Operations Team nga naglangkob sa usa ka rescue truck, usa ka ambulansya, ug usa ka rescue vehicle uban sa mga na-train nga personnel, gipadala dayon ngadto sa amihanang bahin sa Sugbo, ilabina sa Dakbayan sa Bogo, aron motabang sa search and rescue operations. Bisan pa sa kusog nga ulan niadtong gabhiona, nagpadayon gihapon ang grupo aron makaabot sa mga naapektuhan ug makahatag ug tabang.
Niadtong Oktubre 1, 2025, nakaluwas ang mga responder gikan sa PDRRMO, ERUF, ug sa City DRRM og 14-anyos nga bata nga na-trap sa naguba nga building sa Poblacion, Bogo. Giila ni Ret. Col. Dennis Pastor, focal person sa PDRRMO, ang iyang grupo isip mga bayani nga hilom ug mapahiubsanon.
Gipasidungog usab ni Governor Baricuatro ang ilang kadasig ug kaisog sa pagserbisyo, ug gisaad nga padayon ang suporta sa Kapitolyo alang kanila. Padayon usab ang probinsyal nga gobyerno sa pagpalig-on sa disaster preparedness ug response capabilities aron masiguro nga makadangat dayon ang tabang sa tanang Sugbuanon panahon sa krisis.
Source: Cebu Province PIO
I via Renante Socia Lada