Gimandoan sa Cebu City Office of the Building Official (OBO) ang Cebu Normal University (CNU) nga bakantehan ang 8-andana nga College of Arts and Sciences (CAS) Building human makaplagan sa mga inspeksyon ang klarong daotang parte sa istruktura.
Matod sa OBO, ang unibersidad nakalapas usab sa gitugot nga gitas-on sa building ug wala nakakuha ug occupancy permit bisan pa nga gigamit na kini. Sa sulat nga gipadala ni City Building Official Architect Florante Catalan ngadto kang CNU President Daniel Ariaso niadtong Oktubre 7, 2025, gisulti nga sa ocular inspection nakita ang nangabuak nga samento sa slab ug beam nga nagdugtong sa Teacher and Arts Centrum (TAC) ug sa Arts and Sciences Academic Building (ASAB).
Nakaplagan usab sa mga inspector ang mga buak ug pagkachip sa konkreto sa library building ug sa atubangan sa CAS Building. Gipasabot sa OBO nga posible kini tungod sa differential foundation settlement o paglihok sa yuta ilawom sa building nga mahimong nagrabe pa tungod sa magnitude 6.9 nga linog niadtong Setyembre 30.
Base sa report, ang gitugotan ra nga permiso sa CAS building mao ang 6 ka andana, apan ang aktwal nga building adunay 8 ka andana ug usa ka roof deck. Wala usab kini occupancy permit, busa gitagaan kini og notice of violation sa mga inspector sa OBO nga sila Rozien Rivera, Larry Morta, ug Lawrence Jotjot.
Girekomendar sa OBO nga dili gamiton ang CAS ug library building hangtod nga madeklarar nga luwas kini sa mga lisensyadong eksperto. Gisang-at usab ang report sa Cebu City Disaster Risk Reduction and Management Office alang sa aksyon. Gipahimangnoan ang CNU nga magsumite ug bag-ong building ug occupancy permits, ug ayuhon dayon ang mga nadaot nga parte sa building aron malikayan ang kadaut ug katalagman.
Gipahinumdoman ni Catalan ang administrasyon sa CNU nga dili gamiton ang CAS building hangtod nga makompleto ang repair, rehabilitation o retrofitting ug makakuha sa tanang gikinahanglan nga permit, sumala sa National Building Code of the Philippines.
I via Renante Socia Lada