Si Cebu Gob Pamela Baricuatro nangayo og hustisya ug klarong katin-awan alang sa mga Sugboanon nga grabe ang kasakit human sa pinakagrabeng pagbaha nga nahitabo sa probinsya sulod sa daghang katuigan tungod sa Bagyong Tino.
Nasuko ug nabalaka ang gobernadora sa iyang pakig-atubang sa media niadtong Nobyembre 6, duha ka adlaw human gibaha ang kadaghanang lugar sa Metro Cebu — gikan sa Minglanilla hangtod Danao City. Kapin sa usa ka gatus ka kinabuhi ang nawala ug bilyon-bilyon ang kadaot sa mga balay ug imprastraktura.
Sumala sa gobernador, iyang plano nga istoryahon si Presidente Ferdinand Marcos Jr. pag-abot niya sa Cebu aron ipangutana nganong, sa kabilinggan sa ₱26 bilyon nga pondo sa flood control projects, nagpadayon gihapon ang dakong pagbaha.
Base sa datos sa Sumbong sa Pangulo website, adunay 414 ka flood control projects nga nagkantidad og ₱26.7 bilyon nga natukod sa Cebu gikan 2022 hangtod 2025. Apan bisan niini, daghang lungsod gihapon ang nalumos sa baha.
Gikumpirma usab sa gobernadora nga nakigtambayayong ang Kapitolyo sa NBI-7 aron isumite ang mga dokumento sa proyekto, nga ipadala sa Independent Commission for Infrastructure (ICI) aron imbestigahan ang posibleng korapsyon.
Gisaway usab ni Gob. Baricuatro ang mga miaging administrasyon sa Kapitolyo tungod sa kakulang sa long-term nga solusyon ug sa kakulang sa pagbantay sa mga quarry operations sa palibot sa Central Cebu Protected Landscape (CCPL), diin naggikan ang tubig nga nakamugna sa flash flood.
Source: Cebu Province PIO
I Renante Socia Lada