Gipangulohan ni Cebu Governor Pamela S. Baricuatro ang pormal nga paglusad sa unang Laudate Deum Si’ Tree Park sa lalawigan, Lunes, Disyembre 8, didto sa Barangay Inayagan, Siyudad sa Naga. Kini usa ka dakong lakang alang sa dugay’ng plano sa probinsya sa pagpanalipod sa kalikupan ug pag-andam sa epekto sa klima.
Ang programa napundar ubos sa Executive Order No. 56, nga nagtukod og mga green spaces nga tamnan og mga native ug climate-resilient nga kahoy. Tumong niini nga ibalik ang ekolohikal nga balanse, mapalambo ang biodiversity, ug mahatagan ang katawhan og lugar nga makat-onan sa pag-atiman sa kinaiyahan.
Sa iyang mensahe, matud pa sa gobernador nga ang maong parke dili lang tanum-tanum, apan usa ka pahinumdom nga atong ampingan ang kalibutan kay kita ra ang tigbantay niini, dili tag-iya. Giingon pa niya nga kung atong ampingan ang kinaiyahan, atong giatiman ang katawhan ug mga umaabot nga henerasyon.
Gipasabot sab ni Gov. Baricuatro nga dugay na niyang gihandom ang maong kalihokan apan na-postpone kini tungod sa miaging mga kalamidad. Karong panahona, mas nasabtan daw nga mas kinahanglan gyud ang proyekto, aron matanum ang paglaum, pagka-ayo ug pagtuo para sa katawhan.
Nagpasalamat ang gobernador sa Philippine Coconut Authority sa ilang pag-apil pinaagi sa Bayaniyugan Program, ug sa tanang kauban sa Kapitolyo, City Government of Naga, partner agencies, ug komunidad nga mitabang sa kalihokan.
Human sa programa, gipahigayon ang usa ka tree-planting activity diin nagtanoom sila og Agoho, Molave, Narra, ug si Gov. Baricuatro mismo nagtanoom og Cebu Cinnamon tree isip simbolo sa responsableng paglambo sa Sugbo.
Source: Cebu Province PIO
I via Renante Socia Lada
