Gidawat ang Embassy of Sweden sa mga opisyal sa Cebu Provincial Capitol kagahapon Abril 29 aron hisgutan ang posibleng panagtambayayong ilabina sa disaster response ug ubang serbisyo sa gobyerno.
Sa ilang courtesy visit, gipangulohan ni First Secretary Roya Ndure ang delegasyon. Matod niya, importante ang koordinasyon sa panahon sa kalamidad ug gusto nilang mas masabtan kung unsaon pagtinabangay sa probinsya kung adunay natural disaster.
Gipakita usab sa Sweden ang interes sa mga programa sa probinsya sama sa waste segregation ug paggamit sa enerhiya, ug gusto silang mahibalo sa mga prayoridad nga panginahanglan sa Sugbo.
Sa bahin ni Gob. Pamela Baricuatro, iyang gipasabot ang mga programa sa probinsya ug ang pamaagi sa pag-atubang sa kalamidad. Iyang gipasiugda nga importante nga dayon motubag ang mga opisyal ug empleyado sa gobyerno aron mapakalma ang kahadlok sa mga tawo ug mapakita nga andam motabang ang probinsya.
Dugang pa sa gobernador, ang Kapitolyo maoy unang mohatag og dugang nga suporta ug resources sa mga lokal nga gobyerno kung adunay emerhensiya.
Gihisgutan usab ni Gob. Baricuatro ang dugayng plano sa probinsya, lakip na ang pagpalig-on sa serbisyo sa panglawas nga usa sa iyang mga prayoridad.
Miuyon usab si Honorary Consul Karl Mogens Alexander Hey nga kinahanglan adunay kompleto ug organisadong sistema sa disaster response aron mas epektibo ang pagtabang.
Samtang si Consular Officer Angela Tolentino miingon nga importante kaayo ang ka-andam o preparedness, ug mas maayo kung adunay klaro ug lig-on nga plano sa pag-atubang sa mga emerhensiya.
Source: Cebu Province PIO
I via Renante Socia Lada