Padayon nga gipalig-on sa Cebu City Government ang ilang serbisyo publiko pinaagi sa pagpalapad sa mga serbisyong gitanyag sa 24/7 Government Services Hub, aron mas daghang residente ang matabangan bisan gawas sa regular nga oras sa opisina.
Sugod niadtong Abril 13, 2026, gidugang na ang civil registry ug National ID services sa hub nga nahimutang sa Cebu Exchange Tower sa Salinas Drive, Lahug.
Pinaagi sa Office of the City Civil Registrar, mahimo nang makakuha ang mga residente og mga dokumento gikan sa PSA sama sa birth certificate, marriage certificate, ug death certificate bisan unsang orasa gikan Lunes hangtod Domingo.
Available usab ang National ID services matag adlaw gikan alas-3 sa hapon hangtod alas-11 sa gabii, lakip ang registration, pagkuha og papel nga National ID o ePhilID, ug tabang sa pag-generate sa digital National ID.
Gawas niini, anaa usab sa maong 24/7 hub ang ubang frontline services gikan sa lain-laing opisina sama sa Business Permit and Licensing Office, City Treasurer’s Office, Cebu City Traffic Office, Cebu City Police Office, ug Cebu City Health Office, aron mas mapadali ang pagtransaksyon sa katawhan bisan weekends ug holidays.
Source: Cebu City PIO
I via Renante Socia Lada